ನವ ದೆಹಲಿ: ಶ್ರೀಲಂಕಾ ತಂಡ ಏಷ್ಯಾ ಕಪ್ ಫೈನಲ್ನಲ್ಲಿ ಭಾರತ ವಿರುದ್ಧ 50 ರನ್ಗಳಿಗೆ ಆಲ್ಔಟ್ ಆಗುವ ಮೂಲಕ ಸುದ್ದಿಯಲ್ಲಿತ್ತು. ಬಲಿಷ್ಠ ತಂಡವೊಂದು ಏಷ್ಯಾದ ಇನ್ನೊಂದು ತಂಡದ ವಿರುದ್ಧ ಈ ರೀತಿಯಾಗಿ ಆಡಿರುವುದು ಚರ್ಚೆಯ ವಿಷಯವೇ ಸರಿ. ಆದರೆ ಇಲ್ಲೊಂದು ತಂಡ ಟಿ20 ಕ್ರಿಕೆಟ್ನಲ್ಲಿ (T20 Cricket) ಕೇವಲ 15 ರನ್ಗಳಿಗೆ ಆಲ್ಔಟ್ ಅಗಿದೆ. ಆದರೆ, ಈ ತಂಡ ಬಲಿಷ್ಠ ತಂಡವೇನೂ ಅಲ್ಲ. ಕ್ರಿಕೆಟ್ ಹೆಚ್ಚು ಜನಪ್ರಿಯವಲ್ಲದ ಸಾಮಾನ್ಯ ತಂಡ. ಅದಕ್ಕಿಂತಲೂ ಮಿಗಿಲಾಗಿ ಮಹಿಳಾ ತಂಡ. ಆದರೆ, ತಂಡದ 10 ಬ್ಯಾಟರ್ಗಳು ಸೇರಿ 15 ಬಾರಿಸಿದ್ದು ದೊಡ್ಡ ಸುದ್ದಿಯಾಗಿದೆ.
ಇಂಡೋನೇಷ್ಯಾ ವಿರುದ್ಧದ ಟಿ20 ಪಂದ್ಯದಲ್ಲಿ ಮಂಗೋಲಿಯಾ ಈ ರೀತಿ ಔಟಾಗಿರುವುದು. ಇದು ಹ್ಯಾಗ್ಝೌನಲ್ಲಿ ನಡೆಯುತ್ತಿರುವ ಗೇಮ್ಸ್ನ ಪಂದ್ಯ. ಇಂಡೋನೇಷ್ಯಾ ಮಹಿಳಾ ತಂಡ ಮೊದಲು ಬ್ಯಾಟ್ ಮಾಡಿ 188 ರನ್ಗಳ ಗುರಿ ನೀಡಿತ್ತು. ಪ್ರತಿಯಾಗ ಆಡಿದ ಇಂಡೋನೇಷ್ಯಾ 15 ರನ್ಗೆ ಆಲ್ಔಟ್ ಆಗಿದೆ. ಈ ಬ್ಯಾಟಿಂಗ್ನಲ್ಲಿ ಯಾವುದೇ ಬ್ಯಾಟರ್ ಎರಡಂಕಿ ಮೊತ್ತ ದಾಟಲು ಸಾಧ್ಯವಾಗಲಿಲ್ಲ. ಹೆಚ್ಚುವರಿಯಾಗಿ, ಹನ್ನೊಂದು ಬ್ಯಾಟರ್ಗಳಲ್ಲಿ ಏಳು ಮಂದಿ ಶೂನ್ಯಕ್ಕೆ ಔಟಾದರು. ಇಂಡೋನೇಷ್ಯಾ ಪರ ಆಂಡ್ರಿಯಾನಿ ಆಂಡ್ರಿಯಾನಿ 4 ಓವರ್ಗಳಲ್ಲಿ 8 ರನ್ ನೀಡಿ 4 ವಿಕೆಟ್ ಪಡೆದು ಮಿಂಚಿದ್ದಾರೆ.
ಪಿಂಗ್ಫೆಂಗ್ ಕ್ಯಾಂಪಸ್ ಕ್ರಿಕೆಟ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಮಂಗೋಲಿಯಾ ನಾಯಕ ತ್ಸೆಂಡ್ಸುರೆನ್ ಅರಿಂಟ್ಸೆಟ್ಸೆಗ್ ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡರು. ಆದಾಗ್ಯೂ, ಇಂಡೋನೇಷ್ಯಾದ ಬ್ಯಾಟರ್ಗಳು ಬ್ಯಾಟಿಂಗ್ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದರಿಂದ ಈ ನಿರ್ಧಾರವು ತಪ್ಪೆನಿಸಿತು. ಆರಂಭಿಕ ಆಟಗಾರರಾದ ನಿ ಪುಟು ಆಯು ನಂದಾ ಸಕಾರಿನಿ ಮತ್ತು ನಿ ಲುಹ್ ದೇವಿ ಮೊದಲ ವಿಕೆಟ್ಗೆ 106 ರನ್ಗಳ ಜೊತೆಯಾಟ ನೀಡಿದರು. ಮೊದಲ ವಿಕೆಟ್ ಪತನದ ನಂತರ, ದೇವಿ ಕೇವಲ 48 ಎಸೆತಗಳಲ್ಲಿ 62 ರನ್ ಗಳಿಸಿದರು.
ಅಂತಿಮವಾಗಿ ಇಂಡೋನೇಷ್ಯಾ 4 ವಿಕೆಟ್ ನಷ್ಟಕ್ಕೆ 187 ರನ್ ಗಳಿಸಿತು. ಬೌಲಿಂಗ್ ವಿಭಾಗದಲ್ಲಿ ಮೆಂಡ್ಬಯಾರ್ ಎಂಖ್ಜುಲ್, ಮೆಂಡ್ಬಯಾರ್ ಎನ್ಖುಲ್, ಜರ್ಗಲ್ಸೈಖಾನ್ ಎರ್ಡೆನೆಸುವ್ಡ್ ಮತ್ತು ಗನ್ಸುಕ್ ಅನುಜಿನ್ ತಲಾ ಒಂದು ವಿಕೆಟ್ ಪಡೆದರು.
ಗುರಿ ಬೆನ್ನಟ್ಟಿದ ಮಂಗೋಲಿಯಾ ತಂಡ ಎಂಟನೇ ಓವರ್ನಲ್ಲಿ ಕೇವಲ 8 ರನ್ ಗಳಿಸುವಷ್ಟರಲ್ಲಿ ಅರ್ಧದಷ್ಟು ವಿಕೆಟ್ ಕಳೆದುಕೊಂಡಿತು. ಹತ್ತನೇ ಓವರ್ ಅಂತ್ಯದ ವೇಳೆಗೆ ತಂಡದ ಮೊತ್ತ 15 ಆಗಿತ್ತು ಹಾಗೂ ಸಂಪೂರ್ಣವಾಗಿ ಆಲೌಟ್ ಆಯಿತು.
ಕುತೂಹಲಕಾರಿ ಸಂಗತಿಯೆಂದರೆ, ಇದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಂಗೋಲಿಯನ್ ಮಹಿಳೆಯರ ಕ್ರಿಕೆಟ್ ತಂಡದ ಮೊದಲ ಪ್ರವಾಸ . ಆದ್ದರಿಂದ, ಅಂತಹ ಪ್ರದರ್ಶನವು ಖಂಡಿತವಾಗಿಯೂ ಅವರನ್ನು ನಿರಾಸೆಗೊಳಿಸಿದೆ. ಆದರೂ ಅವರು ಕಾಂಟಿನೆಂಟಲ್ ಟೂರ್ನಿಯಲ್ಲಿ ಅವಕಾಶ ಪಡೆಯಲು ಮುಂಬರುವ ಪಂದ್ಯಗಳಲ್ಲಿ ಬಲವಾಗಿ ಮರಳಬೇಕಾಗಿದೆ.
