ಚನ್ನಪಟ್ಟಣ: ಶುಭ ಕಾರ್ಯಗಳ ಋುತುವಿನಲ್ಲಿ ವೀಳ್ಯದೆಲೆ ಬೆಲೆ ಭಾರಿ ಏರಿಕೆ ಕಾಣುತ್ತಿದ್ದು, ಪ್ರತಿ ಪಿಂಡಿಗೆ 12 ಸಾವಿರದಿಂದ 15 ಸಾವಿರ ರೂ. ದರ ಇದ್ದು ಬೆಳೆಗಾರರಿಗೆ ಲಾಭ ತಂದುಕೊಡುತ್ತಿದೆ.
ಒಂದು ಪಿಂಡಿಯಲ್ಲಿ 100 ಎಲೆಗಳ 100 ಕಟ್ಟುಗಳಿರುತ್ತವೆ. ಅಂದರೆ ಎಲೆಯೊಂದಕ್ಕೆ ಸರಾಸರಿ ಒಂದೂವರೆ ರೂಪಾಯಿ ಸಿಗುತ್ತಿದೆ. ಗ್ರಾಹಕರಿಗೆ ಎರಡು ರೂಪಾಯಿಗೆ ಸಿಗುತ್ತಿದೆ. ಬೇಸಿಗೆಯಲ್ಲಿ ಮಂಗಳ ಕಾರ್ಯಗಳ ಜತೆಗೆ ಧಾರ್ಮಿಕ ಕಾರ್ಯಗಳೂ ನಡೆಯುವುದರಿಂದ ಸಹಜವಾಗಿಯೇ ಧಾರಣೆ ಏರಿಕೆ ಕಾಣುತ್ತದೆ.
ಈ ಸಲ ದರ ಹೆಚ್ಚಿದರೂ ಬೆಳೆಗಾರರು ಖುಷಿಪಡುವ ಸ್ಥಿತಿ ಇಲ್ಲ. ಏಕೆಂದರೆ ಕಾರ್ಮಿಕರ ಸಮಸ್ಯೆ, ರೋಗಬಾಧಿಧೆ, ಹವಾಮಾನ ವೈಪರೀತ್ಯ, ಬರಗಾಲ, ಇಳುವರಿ ಕುಸಿತ, ವಿದ್ಯುತ್‌ ಅಡಚಣೆ ಸೇರಿ ಹಲವು ಸಮಸ್ಯೆಗಳು ಬಾಧಿಸುತ್ತಿವೆ. ಹೀಗಾಗಿ ದರ ಹೆಚ್ಚಿದೂ ಹೆಚ್ಚಿನ ಲಾಭಾಂಶ ಸಿಗದು ಎನ್ನುವುದು ರೈತರ ಲೆಕ್ಕಾಚಾರ.
ವೀಳ್ಯೆದೆಲೆ ಬೆಲೆಗೆ ದಾಖಲೆ ಬೆಲೆ ಸಿಗುತ್ತಿರುವುದಕ್ಕೆ ಮುಖ್ಯ ಕಾರಣ ಬಿಸಿಲಿನ ತೀವ್ರತೆಯಿಂದಾಗಿ ವೀಳ್ಯದೆಲೆ ಬಳ್ಳಿಗಳು ಸರಿಯಾಗಿ ಎಲೆ ಕಚ್ಚುತ್ತಿಲ್ಲ. ವೀಳ್ಯದೆಲೆ ಬೆಳೆಗೆ 30 ರಿಂದ 36 ಡಿಗ್ರಿ ಸೆಂ.ಗ್ರೇ ನಷ್ಟು ಉಷ್ಣಾಂಶವಿದ್ದರೆ ಉತ್ತಮ ಇಳುವರಿ ಪಡೆಯಬಹುದು.
40 ಡಿಗ್ರಿವರೆಗೆ ಉಷ್ಣಾಂಶ ಇರುವ ಕಾರಣ ವೀಳ್ಯದಲೆ ಉತ್ಪಾದನೆ ಕುಸಿಯುತ್ತಿದೆ. ಈ ಹಿಂದೆ 15ರಿಂದ 20 ಪಿಂಡಿ ಎಲೆಯನ್ನು ಮಾರುಕಟ್ಟೆಗೆ ಸರಬರಾಜು ಮಾಡುತ್ತಿದ್ದ ರೈತರು 2 ಪಿಂಡಿ ಎಲೆ ತಂದರೆ ಹೆಚ್ಚು ಎಂಬಂತಾಗಿದೆ. ಎಲೆ ಉತ್ಪಾದನೆ ಕುಸಿತಗೊಂಡಿರುವ ಪರಿಣಾಮ ಬೆಲೆ ಹೆಚ್ಚಳವಾಗುತ್ತಿದೆ.
ವೀಳ್ಯದೆಲೆಯನ್ನು ಬಿಡಿಸಲು ನುರಿತ ಕಾರ್ಮಿಕರೇ ಬೇಕಾಗಿದ್ದು, ಸಾಕಷ್ಟು ಶ್ರಮದ ಅವಶ್ಯಕತೆ ಇರುವ ವೀಳ್ಯದೆಲೆ ಬೆಳೆಗೆ ಆಗಾಗ ಕಾಡುವ ಬೂಸ್ಟು ರೋಗ, ಎಲೆಚುಕ್ಕೆ ರೋಗ ಸಹ ಇಳುವರಿ ಕುಂಠಿತಕ್ಕೆ ಕಾರಣವಾಗಿದೆ. ಇದರೊಟ್ಟಿಗೆ ಬರಗಾಲದ ಕಾರಣ ಬೆಳೆಗೆ ಅಗತ್ಯವಿರುವ ನೀರು ಪೂರೈಕೆ ಮಾಡಲು ಸಾಧ್ಯವಾಗದಿರುವುದು, ಮಾರುಕಟ್ಟೆಯಲ್ಲಿನ ದಲ್ಲಾಳಿಗಳ ಹಾವಳಿ ಸಹ ಬೆಳೆಗಾರರನ್ನು ಹೈರಾಣಾಗಿಸಿದೆ.
