ಬೀದರ್: ಈ ಬಾರಿ ಜಿಲ್ಲೆಯಲ್ಲಿ ಭರ್ಜರಿ ಫಸಲಿನ ನಿರೀಕ್ಷೆ ಇದೆ. ಪ್ರಸಕ್ತ ಸಾಲಿನಲ್ಲಿ ಜಿಲ್ಲೆಯಾದ್ಯಂತ ಒಟ್ಟು 2151 ಹೆಕ್ಟೇರ್‌ ಪ್ರದೇಶದಲ್ಲಿ ಮಾವು ಬೆಳೆಯಲಾಗಿದ್ದು, 25,751 ಮೆಟ್ರಿಕ್‌ ಟನ್‌ ಮಾವಿನ ಫಸಲು ಬರುವ ಅಂದಾಜಿಸಿದ್ದು, ಮೀನುಗಳಲ್ಲಿ ಹಾಗೂ ಅಲ್ಲಲ್ಲಿ ಇರುವ ಮಾವಿನ ಮರಗಳಿಗೆ ಈ ಬಾರಿ ಹೂವು ತುಂಬಾನೇ ಚೆನ್ನಾಗಿ ಬಂದಿದೆ ಎಂದು ಮಾಹಿತಿ ತಿಳಿದು ಬಂದಿದೆ.
ಮಾವಿಗೆ ರೋಗ, ಕೀಟ ಬಾಧೆಯೂ ಕಂಡು ಬರದೇ ಇದ್ದರಿಂದ ಹೆಚ್ಚು ಇಳುವರಿಯ ಆಶಾಭಾವನೆಯನ್ನು ಅನ್ನದಾತರು ಹೊಂದಿದ್ದಾರೆ.ಪ್ರತಿ ಹೆಕ್ಟೇರ್‌ಗೆ 11 ಮೆಟ್ರಿಕ್‌ ಟನ್‌ ಮಾವಿನ ಹಣ್ಣುಗಳ ನಿರೀಕ್ಷೆ ಇರುವುದರಿಂದ ಜಿಲ್ಲೆಯಾದ್ಯಂತ 25 ಸಾವಿರಕ್ಕೂ ಅಧಿಕ ಮೆಟ್ರಿಕ್‌ ಟನ್‌ ಇಳುವರಿ ಬರುವ ಸಾಧ್ಯತೆ ಇದೆ. ಹಿಂದಿನ ವರ್ಷ ಬೀದರ್ ಜಿಲ್ಲೆಯಿಂದ ಹೊರ ರಾಜ್ಯಗಳಿಗೆ ಅಷ್ಟೇ ಅಲ್ಲದೆ, ಹೊರ ದೇಶಗಳಿಗೂ ಮಾವು ರಫ್ತು ಮಾಡಲಾಗಿತ್ತು.
ವ್ಯಾಪಾರಿಗಳು ಜಮೀನುಗಳಿಗೆ ಭೇಟಿ ನೀಡಿ ಮಾವನ್ನು ಈಗಲೇ ಖರೀದಿಸುವುದು ಕಂಡು ಬರುತ್ತಿದೆ.ಬೇನಿಶಾನ್‌, ಕೇಸರ್‌, ದೇಶರಿ, ಮಲ್ಲಿಕಾ, ಹುಮಾಯತ್‌ ಸೇರಿ ಸ್ಥಳೀಯ ತಳಿಗಳ ಮಾವನ್ನು ಸಹ ಜಿಲ್ಲೆಯಲ್ಲಿ ಬೆಳೆಯಲಾಗುತ್ತಿದೆ. ಅದರಲ್ಲೂ ವಿಶೇಷವಾಗಿ ಹುಮನಾಬಾದ್‌, ಬೀದರ್, ಬಸವಕಲ್ಯಾಣ ತಾಲೂಕುಗಳಲ್ಲಿ ನೀರಾವರಿ ವ್ಯವಸ್ಥೆ ಇರುವ ಕಾರಣ ಈ ತಾಲೂಕುಗಳಲ್ಲಿ ಹೆಚ್ಚಿನ ಪ್ರಮಾಣದ ಮಾವು ಬೆಳೆಯಲಾಗಿದೆ. ಅನೇಕ ರೈತರು ಎಕರೆಗಟ್ಟಲೇ ಮಾವಿನ ತೋಪುಗಳನ್ನು ನಿರ್ಮಿಸಿದ್ದಾರೆ.
ಪ್ರತಿ ವರ್ಷ ಅವು ಫಸಲು ನೀಡುತ್ತಲೇ ಇವೆ.ಪ್ರಸಕ್ತ ಸಾಲಿನಲ್ಲಿ ಜಿಲ್ಲೆಯಾದ್ಯಂತ 2151 ಹೆಕ್ಟೇರ್‌ನಲ್ಲಿ ಮಾವು ಬೆಳೆಯಲಾಗಿದ್ದು, 25,751 ಮೆಟ್ರಿಕ್‌ ಟನ್‌ ಮಾವಿನ ಇಳುವರಿಯ ನಿರೀಕ್ಷೆಯಿದೆ. ಎಲ್ಲೆಡೆ ಮಾವಿಗೆ ಉತ್ತಮ ರೀತಿಯಲ್ಲಿ ಹೂವು ಇದ್ದು, ಯಾವುದೇ ರೋಗ, ಕೀಟಗಳ ಬಾಧೆ ಕಂಡು ಬಂದಿಲ್ಲ.ರೈತರು ನಿರ್ವಹಣೆಯನ್ನೂ ಸಹ ಒಳ್ಳೆಯ ರೀತಿಯಿಂದ ಮಾಡುತ್ತಿದ್ದು, ಗುಣಮಟ್ಟದ ಫಸಲು ಬರುವ ನಿರೀಕ್ಷೆಯಿದೆ.
