ನವದೆಹಲಿ: ಕಳಪೆ ಲ್ಯಾಪ್‌ಟಾಪ್‌ ವಿತರಿಸಿದ್ದ ಅಮೆಜಾನ್‌ಗೆ ಮತ್ತು ಗ್ರಾಹಕನಿಗೆ ಹಣವನ್ನು ವಾಪಸ್‌ ನೀಡಲು ಒಂದೂವರೆ ವರ್ಷ ಸತಾಯಿಸಿದ ಚಿಲ್ಲರೆ ವ್ಯಾಪಾರಿಗೆ ದಿಲ್ಲಿಯ ಜಿಲ್ಲಾಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗ 45 ಸಾವಿರ ರೂ. ದಂಡ ವಿಧಿಸಿದೆ ಎಂದು ಮಾಹಿತಿ ತಿಳಿದು ಬಂದಿದೆ.
“ಲ್ಯಾಪ್‌ಟಾಪ್‌ ಅನ್ನು ವಾಪಸ್‌ ಕೊಟ್ಟಾಗ ಅದಕ್ಕೆ ಪಿಕ್‌-ಅಪ್‌ ಸ್ಲಿಪ್‌ ನೀಡಿಲ್ಲ. ಇದರಿಂದ ತಕ್ಕ ವ್ಯಕ್ತಿಗೆ ಉತ್ಪನ್ನವನ್ನು ಮರಳಿಸಿರುವೆ ಎನ್ನುವುದಕ್ಕೆ ಗ್ರಾಹಕನಲ್ಲಿ ಯಾವುದೇ ಪುರಾವೆ ಕೂಡ ಇರುವುದಿಲ್ಲ. ಈ ದೋಷಗಳನ್ನು ಗಮನಿಸಬೇಕು. ಇಂತಹ ಸಂಗತಿಗಳನ್ನು ನಿರ್ಲಕ್ಷ್ಯ ಮಾಡಿದರೆ ಅದು ಅನ್ಯಾಯದ ವ್ಯಾಪಾರವಾಗುತ್ತದೆ,’’ ಎಂದು ಆಯೋಗದ ಅಧ್ಯಕ್ಷ ಎಸ್‌.ಎಸ್‌.ಮಲ್ಹೋತ್ರಾ, ಸದಸ್ಯರಾದ ರಶ್ಮಿ ಬನ್ಸಾಲ್‌ ಮತ್ತು ರವಿಕುಮಾರ್‌ ಅಭಿಪ್ರಾಯಪಟ್ಟಿದ್ದಾರೆ.ಈ ವ್ಯವಹಾರಕ್ಕೆ ಸಂಬಂಧಿಸಿದಂತೆ ಅಮೆಜಾನ್ ಲಿಖಿತ ಹೇಳಿಕೆಯನ್ನು ತಡವಾಗಿ ಸಲ್ಲಿಸಿತ್ತು.
ಅಮೆಜಾನ್‌ನಲ್ಲಿಖರೀದಿಸಿದ ಲ್ಯಾಪ್‌ಟಾಪ್‌ನಲ್ಲಿನ ದೋಷ ಮತ್ತು ಹಣ ಮರುಪಾವತಿಗೆ ಆದ ವಿಳಂಬ ಕುರಿತು ದಿಲ್ಲಿ ಗ್ರಾಹಕರೊಬ್ಬರು ದೂರು ನೀಡಿದ್ದು, ಗಮನಿಸಿದ ಆಯೋಗ ಕಠಿಣ ಕ್ರಮ ಕೈಗೊಂಡಿದೆ.‘‘ಉತ್ಪನ್ನಗಳ ಮಾರಾಟದ ಬಗ್ಗೆ ಖಾತ್ರಿ ನೀಡುವುದು, ಒಂದು ವೇಳೆ ವಿತರಿಸಿದ ಉತ್ಪನ್ನದಲ್ಲಿ ದೋಷವಿದ್ದರೆ ಅದನ್ನು ತಕ್ಷಣ ಬದಲಾಯಿಸಿಕೊಡಬೇಕು. ಸಂದಾಯವಾಗಿದ್ದ ಹಣವನ್ನು ಗ್ರಾಹಕರಿಗೆ ಮರು ಪಾವತಿ ಮಾಡುವುದು ಅಮೆಜಾನ್ ಕರ್ತವ್ಯವಾಗಿದೆ’’ ಎಂದು ನ್ಯಾಯಾಲಯ ಹೇಳಿದೆ.
ಅಮೆಜಾನ್ ಸಂಸ್ಥೆಗೆ ನೋಟಿಸ್‌ ನೀಡಿದ್ದರೂ ವಿಚಾರಣೆಗೆ ಹಾಜರಾಗಿರಲಿಲ್ಲ. ಜೊತೆಗೆ, ಗ್ರಾಹಕರಿಗೆ ಸಮಸ್ಯೆಯಾದಾಗ ಅದನ್ನು ಕಿರಿಕಿರಿಯಿಲ್ಲದೆ, ತ್ವರಿತವಾಗಿ ಪರಿಹರಿಸುವಂಥ ವ್ಯವಸ್ಥೆಯನ್ನು ಅಮೆಜಾನ್ ಹೊಂದಿಲ್ಲ. ಇದು ನಿಜಕ್ಕೂ ಖೇದಕರ’’ ಎಂದು ದೆಹಲಿ ಫೋರಂ ಅಭಿಪ್ರಾಯಪಟ್ಟಿದೆ.
