ಕಾಂಚೀಪುರಂ:ಮಹಿಳೆಯರ ಅಚ್ಚುಮೆಚ್ಚಿನ ಉಡುಗೆಯೆಂದರೆ ರೇಷ್ಮೆ ಸೀರೆ. ಆದರೆ, ಸೀರೆಯನ್ನು ಇಷ್ಟುಪಡುವ ನೀರೆಯರಿಗೆ ಒಂದು ಬೇಸರವಾಗುವಂಥ ಸಂಗತಿಯೊಂದಿದೆ.
ಮಹಿಳೆಯರ ಅಚ್ಚುಮೆಚ್ಚಿನ ಕಾಂಚೀಪುರಂ ರೇಷ್ಮೆ ಸೀರೆಗಳ ದರ ಕಳೆದ ಆರು ತಿಂಗಳುಗಳಿಂದ ನಿರಂತರವಾಗಿ ಏರುತ್ತಲೇ ಬಂದಿದ್ದು, ಈಗ ಪ್ರಸ್ತುತ ಅದರ ದರ ಶೇ. 50ರಷ್ಟು ಹೆಚ್ಚಾಗಿದೆ. ಇದರಿಂದಾಗಿ, ಹಲವಾರು ಮಂದಿ ಕಾಂಚಿಪುರಂ ಸಿಲ್ಕ್ ಸೀರೆಗಳ ಶೋರೂಂಗಳಿಗೆ ಹೋಗಿ ಅಲ್ಲಿ ದರ ಕೇಳಿ ಪೆಚ್ಚಾಗುತ್ತಿದ್ದಾರೆ.
ಕಾಂಚೀಪುರಂ ಸಿಲ್ಕ್ ಸೀರೆಗಳ ಇತಿಹಾಸದಲ್ಲಿ ಹೀಗೆ ಅಲ್ಪಾವಧಿಯಲ್ಲೇ ಶೇ. 30ರಿಂದ 50ರಷ್ಟು ದರ ಹೆಚ್ಚಳವಾದ ಉದಾಹರಣೆಯೇ ಇಲ್ಲ. ಹೀಗಾಗುತ್ತಿರುವುದು ಇದೇ ಮೊದಲು ಎನ್ನುವುದು ವರ್ತಕರ ಮಾತು.
ಕಳೆದ ವರ್ಷ ಅ. 1ರಂದು 22 ಕ್ಯಾರಟ್ ಚಿನ್ನದ ಬೆಲೆ ಪ್ರತಿ ಗ್ರಾಂಗೆ 5,356 ರೂ. ಇತ್ತು. ಈ ವರ್ಷದ ಮೇ 21ರಂದು 22 ಕ್ಯಾರಟ್ ಚಿನ್ನದ ಬೆಲೆ ಪ್ರತಿ ಗ್ರಾಂಗೆ 6,900 ರೂ.ಗಳಿಗೆ ಏರಿಕೆಯಾಗಿದೆ. ಇದೇ ಅವಧಿಯಲ್ಲಿ ಬೆಳ್ಳಿಯ ಬೆಲೆಯಲ್ಲೂ ಏರಿಕೆಯಾಗಿದೆ. ಪ್ರತಿ ಗ್ರಾಂ ಬೆಳ್ಳೆಯ ಬೆಲೆ ಪ್ರತಿ ಗ್ರಾಂಗೆ ಶೇ. 75.5ರಿಂದ 101 ರೂ.ಗಳಿಗೆ ಏರಿಕೆಯಾಗಿದೆ.
ಚಿನ್ನ ಹಾಗೂ ಬೆಳ್ಳಿಯ ಬೆಲೆ ಹೆಚ್ಚಾಗಿದ್ದರಿಂದಲೇ, ವರ್ಷಕ್ಕೆ 10 ಸಾವಿರ ಕೋಟಿ ರೂ. ಬ್ಯುಸಿನೆಸ್ ಮಾಡುವ ಕಾಂಚೀಪುರಂ ಸೀರೆಗಳ ತಯಾರಕರು, ಈಗ ಕೊಂಚ ಹಿನ್ನಡೆ ಅನುಭವಿಸುವಂತಾಗಿದೆ. ಸೀರೆಗಳ ಬೆಲೆಗಳಲ್ಲಿ ಶೇ. 40ರಿಂದ 50ರಷ್ಟು ಹೆಚ್ಚಾಗಿದ್ದು, ಅದರ ಪರಿಣಾಮ ಸೀರೆಯ ಮಾರಾಟ ಮೇಲೆ ಕೊಂಚ ವ್ಯತಿರಿಕ್ತ ಪರಿಣಾಮ ಬೀರಿದೆ ಎಂದು ಹೇಳಿದ್ದಾರೆ.
ಈಗ ಬೆಲೆ ಹೆಚ್ಚಾಗಿರುವುದರಿಂದ ಕಾಂಚೀಪುರಂ ಸೀರೆಗಳನ್ನು ಕೊಳ್ಳಲು ಬರುವ ಗ್ರಾಹಕರು, ಅದರ ಈಗಿನ ದರ ಕಂಡು ಹೌಹಾರಿ, ಬೇರೆ ಬ್ರಾಂಡ್ ನ ಸೀರೆಗಳನ್ನು ಕೊಂಡು ಹೋಗುತ್ತಿದ್ದಾರೆ. ಕೆಲವರು ತಾವು ಕೊಳ್ಳಬೇಕು ಅಂದುಕೊಂಡಿದ್ದ ಸೀರೆಗಳ ಸಂಖ್ಯೆಯನ್ನು ಕಡಿಮೆ ಮಾಡಿಕೊಂಡು ತಮ್ಮ ಬಜೆಟ್ ಗೆ ಆಗುವಷ್ಟು ಸೀರೆಗಳನ್ನು ಕೊಳ್ಳುತ್ತಿದ್ದಾರೆ. ಇದರಿಂದಾಗಿ, ಆರು ತಿಂಗಳುಗಳ ಹಿಂದೆ ಹೋಲಿಸಿದರೆ ಆಗ ಇದ್ದ ಕಾಂಚೀಪುರಂ ಸೀರೆಗಳ ಮಾರಾಟ ಶೇ. 10ರಷ್ಟು ಇಳಿಮುಖವಾಗಿದೆ ಎಂದು ವರ್ತಕರು ಹೇಳಿದ್ದಾರೆ ಎಂದು ಮಾಹಿತಿ ತಿಳಿದು ಬಂದಿದೆ.
