ನಾಗಪುರ: ರಾಷ್ಟ್ರೀಯ ಸ್ವಯಂ ಸೇವಕ ಸಂಘ ತನ್ನ ವಾರ್ಷಿಕ ತರಬೇತಿ ಕಾರ್ಯಕ್ರಮಗಳ ವಿಷಯ ಹಾಗೂ ನಾಮಕರಣಗಳಲ್ಲಿ ಬದಲಾವಣೆಗಳನ್ನು ತಂದಿದ್ದು, ಈ ಪರಿಷ್ಕರಣೆಗಳು ಪ್ರಸಕ್ತ ವರ್ಷದಿಂದಲೇ ಜಾರಿಗೆ ಬರಲಿವೆ ಎಂದು ಆರೆಸ್ಸೆಸ್ ಜಂಟಿ ಪ್ರಧಾನ ಕಾರ್ಯದರ್ಶಿ ಮನಮೋಹನ್ ವೈದ್ಯ ಅವರು ಸೂಚಿಸಿದರು.
ಆರೆಸ್ಸೆಸ್‌ನ ವಾರ್ಷಿಕ ‘ಅಖಿಲ ಭಾರತೀಯ ಪ್ರತಿನಿಧಿ ಸಭಾ’ ಸಮಾವೇಶದ ವೇಳೆ ಸುದ್ದಿಗೋಷ್ಠಿಯಲ್ಲಿ ಅವರು ಈ ಮಾಹಿತಿ ನೀಡಿದ್ದು,
ಏಳು ದಿನಗಳ ‘ಪ್ರಾಥಮಿಕ ಶಿಕ್ಷಾ ವರ್ಗ’, 20 ದಿನಗಳ ‘ಸಂಘ ಶಿಕ್ಷಾ ವರ್ಗ- ಪ್ರಥಮ ವರ್ಷ’, 20 ದಿನಗಳ ‘ಸಂಘ ಶಿಕ್ಷಾ ವರ್ಗ- ದ್ವಿತೀಯ ವರ್ಷ’ ಮತ್ತು 25 ದಿನಗಳ ‘ಸಂಘ ಶಿಕ್ಷಾ ವರ್ಗ’- ತೃತೀಯ ವರ್ಷ’ದ ತರಬೇತಿ ಕಾರ್ಯಕ್ರಮಗಳಲ್ಲಿ ಕೊಂಚ ಬದಲಾವಣೆಗಳನ್ನು ಜಾರಿಗೊಳಿಸಲಾಗಿದೆ ಎಂದು ತಿಳಿಸಿದರು.
‘ಪ್ರಾಥಮಿಕ ಶಿಕ್ಷಾ ವರ್ಗ’ದ ವೇಳೆ ಹೊಸ ನೇಮಕಾತಿಗಳನ್ನು ನಡೆಸಲಾಗುತ್ತಿದ್ದು, ಬಳಿಕ 15 ದಿನಗಳ ‘ಸಂಘ ಶಿಕ್ಷ ವರ್ಗ’ ನಡೆಯುತ್ತಿದ್ದು,ಇದಕ್ಕೆ ಈ ಹಿಂದೆ ‘ಸಂಘ ಶಿಕ್ಷಾ ವರ್ಗ- ಪ್ರಥಮ ವರ್ಷ’ ಎಂದು ಕರೆಯಲಾಗುತ್ತಿತ್ತು. ಇದು 20 ದಿನಗಳ ಕಾಲ ನಡೆಯುತ್ತಿತ್ತು.ಈ ಮುಂಚಿನ ‘ದ್ವಿತೀಯ ವರ್ಷ’ ಮತ್ತು ‘ತೃತೀಯ ವರ್ಷ’ದ ತರಬೇತಿ ತರಗತಿಗಳನ್ನು ಇನ್ನು ಮುಂದೆ ‘ಕಾರ್ಯಕರ್ತ ವಿಕಾಸ ವರ್ಗ- 1 ಮತ್ತು ‘ಕಾರ್ಯಕರ್ತ ವಿಕಾಸ ವರ್ಗ- 2’ ಎಂದು ಕರೆಯಲಾಗುತ್ತದೆ ಎಂದು ಮಾಹಿತಿ ತಿಳಿದು ಬಂದಿದೆ.
